Partia Socialdemokrate (PSD), ka reaguar pas mosanëtarësimit të Kosovës në INTERPOL.

Partia Socialdemokrate (PSD), ka reaguar për mosanëtarësimin e Kosovës në INTERPOL, duke thënë se bllokimi i Kosovës për t’u anëtarësuar në këtë organizatë i shërben fuqizimit të krimit dhe përkeqëson sigurinë rajonale e globale, raporton lajmi.net.

“Anëtarësimi i Republikës së Kosovës në INTERPOL është i pashmangshëm dhe i domosdoshëm. Atë nuk mund ta ndalin “fitoret e Pirros” të Qeverisë së Serbisë”, thuhet në reagimin e PSD-së.

Tutje PSD vlerëson se fushata agresive e Serbisë kundër anëtarësimit të Kosovës në INTERPOL, është dëshmi e dështimit të dialogut në mes të dyja vendeve.

“Fushata agresive e Qeverisë së Serbisë kundër anëtarësimit të Kosovës në INTERPOL dëshmon dështimin e dialogut të deritanishëm midis Kosovës dhe Serbisë. Ngjarja e sotme duhet të shërbejë si leksion për pushtetin, që të bashkërendohet me opozitën, për ta rikonfiguruar sa më parë dialogun me Serbinë. Dialogu i drejtuar nga Presidenti Thaçi po e bën Serbinë çdo ditë e më shumë agresive kundrejt Kosovës”, thuhet më tutje në reagimin e PSD-së.

Partia Socialdemokrate përmes këtij reagimi ka kërkuar përgjegjësi dhe llogaridhënie politike e profesionale, nga ana e Qeverisë dhe Ministrisë së Jashtme të Republikës së Kosovës, lidhur me dështimin e anëtarësimit të Kosovës në INTERPOL.